LAOAG CITY – Impanagetget ni Senator-judge Imee Marcos a maibilang kas ‘grave abuse of discretion’ wenno panagabuso iti panagdesision ti Senate Impeachment Court nga ipa-subpoena dagiti bank ken tax rekords ni Vice President Sara Duterte.
Saan nga umanamong ni Senator-judge Marcos ti panangiyisiyu ti subpoena para iti bangko, Bureau of Internal Revenue (BIR), ken Anti-Money Laundering Council (AMLC) rekords a paset dagiti panawen a saan pay a bise president ni Duterte.
Kunana a nalawag iti pinal a desision ti Supreme Court iti kaso ni Duterte kontra ti House of Representatives no sadinno a ti maysa a kaso ti impeachment ket masapul laeng a maipanggep kadagiti garaw nga adda pakainaiganna iti agdama a termino a pagserbian ti maysa nga opisial.
Inlawlawag ni Senator Marcos a ti termino ti bise president ket nangrugi idi Hunio 30,2022 no sadinno a ti pannakaitipon dagiti petsa a saan pay daytoy a bise president ket saan a karaman iti termino ti maysa nga impeachable officer.
