LAOAG CITY – Maikalkalikagum ti pannakaaprobar ti kanayunan a pundo para iti Anti-rabies vaccine ditoy siudad ti Laoag.
Segun ken ni Dr. Brigo Catcatan, ti Officer In Charge ti City Health Office, daytoy ket kalpasan nga agkurkurang ti suplay ti bakuna iti opisinada gapu ta adu dagiti indibidual ti agturturong kadakuada tapno agpabakuna dagitoy.
Nupay kasta, kunana nga agtultuloy ti panangidiayada kadagiti maseknan nga indibidual a nakagat iti ayup kas ti aso wenno pusa tapno malappedan ti panagwaras ti virus iti bagida.
Inlawlawagna a maibasar iti datos iti rekordda, dumanonen iti sumurok 2,700 ti napan nagpakabuna iti opisinada sipod idi Enero ita a tawen no idasig iti napalabas a tawen nga addaan ti 2,859.
Kunana a nasaysayaat no mabakunaan dagiti tarakenda nga ayup tapno makissayan ti bilang dagiti maimalmaldit nga animal bites ditoy siudad ti Laoag.
