LAOAG CITY – Inpakaammo ni Mayor Rommel Labasan iti ili ti Pinili nga adda iti maangay a panagtataripnong dagiti pannakabagi ti Universal Leaf Philippines Incorporation.
Daytoy ket mainaig pay laeng iti in-inot a panagbaba iti presyo ti tabako ditoy probinsia a pakaapektaran unay dagiti mannalon aglalo dagiti agmulmula iti nasao a produkto.
Kunana a manamnama a magpasasaritaan no kasano a masolusionan daytoy tapno saan a kakaasi dagiti mannalon aglalo ita nga oil crisis wenno kangina ito krudo.
Inbatad ni Labasan a binalakadan na dagiti mannalon iti ili ti Pinili nga agreshistro da iti organisasion iti National Tobacco Administration tapno adda a matutukan dagitoy.
Segun kenkuana, ti agdama a presio ti tabako ket agay-ayam laengen ti P60-80 iti maysa a kilo no ikumpara iti napalpalabas a tawen nga umabot iti 100 a pisos ti kada kilo.
Innayon na a saan da nga agkurkurang iti panangtulong kadagiti mannalon iti ili ti Pinili nga isuda iti kaadoan kadagiti agmula ti tabako ditoy probinsia gapu ta ammo da a daytoy iti maysa kadagiti pagsapolan da.
Inpanamnama ti mayor nga iti kabiitan a panawen ket masolbar daytoy a problema gapu ta patien na a dagiti mannalon ket dakkel iti akemda iti benneg ti agkrikuktura.
