LAOAG CITY – Ibilang ni Atty. Myko Mendoza iti ili ti Badoc ti panageksamen na iti Bar Exams idi nobyembre itay napan a tawen kas “torture” saan laeng a mentally no di ket, emotionally, physically ken psychologically.
Daytoy ket gapu ta sakbay ti eksaminasyon ket nagsakit ken dimmanon payen ti punto a natudukan ti dextrose isut gapu na a nakakapkapuy iti dayta a panawen.
Inbatad na a gapu iti sitwasyon na ket saan a nakabasbasa gapu ta iparit ti kabsat na tapno maliklikan ti pannaka-stress na a possible a pagkapuyan ti simmune system na.
Gapu iti daytoy, nagdengdengngeg lattan kadagiti videos ken audio codals a naggapo iti review center da.
Nupay kasta, dakkel ti panagyaman na kadagiti tattao a nangpatpatibker ken nangsuportar kenkuana tapno magun-od na ti arapaap na.
Inistorya ni Mendoza a ti ibilang na a maysa a nagbalin a karit kenkuana iti panagadal na iti Law School ket idi nabagsak iti maysa a subject na iti midterm exam gapu ta saanna a sinurot ti technical aspect ti eksaminasyon.
Inbaga na a nagkarkararag a no maisakad na daytoy a napasamak kenkuana ket inkari na nga ad-adda pay nga igaed na ti agbasa ken isu ti nagbalin nga inspirasyon na kabayatan ti panagreview na para iti bar exams.
Kabayatanna, inbaga ni Atty. Mendoza a no i-range na ti kinarigat ti bar examinations iti 1-10 ket ikabil na ti 9.
Ni Atty. Mendoza ket nagturpos iti Law School iti Mariano Marcos State University (MMSU) iti ciudad ti Batac.
