LAOAG CITY – Inpetteng ti Department of Social Welfare and Development a panagsalungasing iti paglintegan a nabingay ti gatad manipud iti Social Amelioration Program iti kada pamilya.
Iti ekslusibo a pannakiuman ti Bombo Radyo Laoag kenni Undersecretary Rene Glen Paje iti DSWD national office, panaglabsing iti linteg ken agrimento gapu ta saan nga husto ti inaramid dagiti opisyal ti barangay a mapaggugudua ti kuarta manipud iti nasao a programa.
Kuna na a nasken a maipakaamo kadagiti opisyal ti DSWD ti madi nga aramid dagiti opisyal ti barangay tapno maurnos ti problema.
Daytoy ket mainaig ti inaramid ti kapitan iti Brgy. 9, San Lorenzo, iti ili ti Sarrat a maipagarup a pinaggugudua na ti total ti SAP benefit tapno maikkan amin dagiti pamilya nga agnanaed iti nasao a barangay.
Inadmitir ni Usec. Paje nga adda pay dagiti maaw-awat da a report a maisugsugal ti SAP benefit ken dadduma pay, a daytoy ket maikanniwas iti linteg ngem aramiden da amin a kabaelan da tapno maliklikan ti nasao a problema.
Innayon na a nasken laengen nga igatang dagiti tattao ti naawat da nga ayuda kadagiti kasapulan da iti inaldaw wenno ited kadagiti miembro ti pamilya da nga ad-adda nga agkasapulan ti tulong.
