LAOAG CITY – Naipasa iti maikadua ken maudi a pannakaibasa ti Draft City Resolution No. SP 2023-166 wenno ti pannakabukel ti Laoag City Local Price Coordinating Council (LCLPCC).
Segun kenni Sang. Panlungsod Jason Perera, ti nasao a council ket isu ti mangmonitor iti presyo ti karne ti baboy a mailaklako iti merkado publiko ditoy ciudad ti Laoag.
Kunana pay nga adda ti naawat na a reports nga iti laksid nga adda ti napagnunumoan a presyo ti karne ti baboy ket maipagarop a nayunan dagiti meat vendors ti presyo na no daytoyen ket ilako da.
Gapo iti daytoy, kunana nga imonitor ti Laoag City Local Price Coordinating Council ti presyo ti nasao a karne ti baboy ken isu ti mangireport iti Dept. of Agriculture.
Namunganay daytoy iti saan a pannakaituloy ti pannakaikeddeng ti sangsangkamaysa a presyo ti karne ti baboy ditoy probinsya a kalikagom ti Sang. Panlalawigan no sadinno saan nga immanamong ti konseho ditoy ciudad ti Laoag gapo ta awan ti bileg ti lokal a gobierno.
