LAOAG CITY – Inpasingked ni Police Supt. Dominic Guerrero, ti chief of police ti ciudad iti Laoag nga awan ti foul play ti napasamak a desgrasya a poon ti nakatayan ni Vice Mayor Michael Fariñas.
Maipalagip a pimmusay a dagus ti bise mayor kalpasan a nadesgrasya ti inturong na a mercedes benz iti by-pass road a paset ti Barangay Vira ti nasao a ciudad.
Naamoan a kadwa ti bise mayor ti pulis a bodyguard na a ni SPO3 Melchor Geronimo ngem nakalasat daytoy manipod ti nakaam-ames a desgrasya.
Mainaig ti daytoy, kinumpirmaran manen ni Guerrero a nag-overshoot ti lugan ti bise mayor a nakaidungparan na iti concrete barrier a nagresulta ti panagpulpuligos ken nakatennagan ti lugan iti taltalon.
Inbatad ni Guerrero a possible a bayat ti panagpulpuligos ti lugan ket natennag ti bise mayor a nangitunda ti nagsagabaan na ti nakana a sugat kangrunaan na iti ulo na.
Iti agdama, agtultuloy a maob-obserbaran ni Geronimo iti Laoag City General Hospital (LCGH) ken saan pay unay a makasarita.
Kuna ni Guerrero nga iyur-uray da a makasao a naimbag ni Geronimo tapno maamoan da no ania ti sibubukel a napasamak.
