LAOAG CITY – Inlawlawag ni Atty. Domingo Cayosa, ti dati nga IBP President a ti kiddaw a pannakaamendar ti Oil Deregulation Law ket saan a garantiya a maipababa ti presyo dagiti produkto a petrolyo.
Para kenni Cayosa, narigat daytoy a banag gapo ta ti Oil Regulation Law ket isu ti nangpabus-oy iti market force a mangikeddeng ti presyo dagiti petrolyo.
Segun kenni Cayosa, saan met a mabalin a kontrolen ti gobierno ti presyo ti petrolyo nangruna iti biang ti pribado.
Inpetteng na a no makibiang ti gobierno iti daytoy ket amangan no saan a mangipatulod ti global players ti petrolyo no awan met laeng ti mapastrek da.
Inbatad ni Cayosa nga arig na ket napintas laeng a denggen ti lungalong tapno agkalma ti publiko iti panagtultuloy a panagngato ti presyo dagiti petrolyo ngem posible a narigat a maimplementar nangruna ket saan met a sigurado no kayat ti Kongreso a maisubli iti nasao a sistema no sadinno a ti gobierno ti mangikeddeng ti presyo.
Mainaig iti daytoy, kuna ni Cayosa a no kontrolen ti gobierno ken agdeisyon ti global players a saan a mangipatulod ti petrolyo ket dakdakkel ti problema a mangitunda pay ti krisis.
Kunana a maysa kadagiti mabalin kuma nga aramiden ti gobierno ket ti panagkontrol no mano ti maipatpataw nga excise tax iti kada litro ti petrolyo.
Nupay kasta, arig na awan met ti ar-aramiden ti gobierno seknan iti daytoy gapo ta adda pay ti gundaway a dakdakkel ti mainayun a tax iti petrolyo ngem iti actual cost ti nasao a produkto.
