LAOAG CITY – Maituloy a dagus ti bike lane ditoy ciudad ti Laoag apaman a maipinal ti napabaro a plano na.
Iti naiyuswat a sesyon iti konseho ditoy ciudad ti Laoag, naibinsa-binsa a masapol a maikkat dagiti plant box ken mailawlawa ti kalsada tapno makadalyasat a naimbag dagiti agiturturong ti bisikleta.
Malaksid iti daytoy, masapol a mapasilawan pay ti lugar tapno nalawag ken maliklikan ti possible a mapasamak a desgrasya.
Inpetteng ni Konsehal Jason Perera a no agtultuloy a maaramid ti bike lane a saan a maikorehir dagiti saan nga umiso a naobserbaran da ket sayang laeng ti mabusbos a pondo.
Mainaig iti daytoy, inbatad ni Assistant District Engr. Joselito Dean iti Department of Public Works and Highways – 1st Engineering District a tungpalen da amin dagiti inlungalong ti konseho ditoy ciudad gapu ta mamati a pagsayaatan amin daytoy ti kaadoan.
