LAOAG CITY – Naitantan ti pannakaibunong dagiti Individual Titles kadagiti benepisiario ti Department of Agrarian Reform Office gapu kadagiti bagyo a dimmuprak ditoy probinsia.
Daytoy ti inpakaammo ni Mr. Vic Ines, ti Provincial Agrarian Reform Program Officer II iti Department of Agrarian Reform Office ditoy probinsia .
Inbatad ni Ines nga ita koma a bolan ti pannakaibunong dagiti Individual titles kadagiti agarup 800 nga Agrarian Reform Benificiaries ngem naitantan gapu kadagiti nagsasaruno a bagyo .
Inpakaammo na a dagiti benepisiario ket naggapu kadagiti sumagmamano nga ili ti probinsia ken nabayagen dagitoy a mangsuksukay ken mangtaltalon kadagiti nasao a lote.
Innayon na a dagiti maibunong a titulo ti daga ket ket addaan ti kalawa a nasurok a tallupulo ket dua nga ektaria a naiproseso babaen iti Department of Agrarian Reform ken Land Registration Authority.
Ti nasao a programa ket paset pay laeng ti Support to Parcelization of Lands for Individual Titling (SPLIT) Project ti Department of Agrarian Reform.
