LAOAG CITY – Inrubuat ti Liga ng mga Barangay ditoy siudad ti Laoag nga idadauloan ni Brgy. Chairman Rbee Ablan ti pannakaibunong dagiti libro kadagiti ubbing ditoy siudad.
Segun kenkuana, daytoy ket kas paset ti pet project-da no sadinno a kalikagumda a masursuroan dagiti maseknan nga ubbing babaen iti panagbasa dagitoy.
Inbatadna a planoda a maipatungpal daytoy a programa iti intero a probinsia tapno ad-adu dagiti ubbing ti makasursuro iti panagbasa.
Inlawlawagna a babaen iti daytoy ket makatulong iti cognitive ken emotional development dagiti ubbing.
Kunana nga agibunongda ti rinibu a libro kadagiti ubbing no sadinno ket dumanon iti 15 a ribu daytoy a manipud iti Estados Unidos.
Innayonna a manamnama nga iti mabiit ket maibunong dagiti libro kadagiti Day Care Center ditoy siudad ti Laoag.
