LAOAG CITY – Kwinestyunaran ti konseho ditoy ciudad ti Laoag ti pannakaibunong dagiti sinako a bagas a naggapo iti gobierno national, Japan ken Thailand kadagiti naapektaran ti bagyo Ineng ditoy ciudad iti kallabes.
Daytoy ket kalpasan nga adda dagiti residente a nagreklamo a saan a sapasap ti pannakaibunong na.
Gapu iti daytoy, pinagpalawag ni Vice Mayor Vicentito Lazo iti konseho dagiti empleyado ti CSWDO no ania ti kwalipikasyon dagiti nabunungan.
Kabayatan ti kaadda dagitoy iti konseho, nailawlawag dagiti proseso iti pannakapili dagiti beneficiaries ken inmardar ti bise mayor kadagiti taga CSWDO ti pannakaala amin ti nagan dagiti maikkan ken rason no apay nga isuda ti napili.
Immun-unan nga inbatad ni Mrs. Joan Pasigue iti Social Welfare and Development Office nga umabot ti nasurok a 9 a ribo a pamilya ti nabunungan ti bagas.
Kuna na a dagiti binunungan da ket dagiti kangrunaan a naapektaran ti bagyo Ineng.
