LAOAG CITY – Inrakurak ni Miss Cathy Estavillo, sekretaryo ti Bantay-Bigas Group a ti pannakaideklarar ti Food Security Emergency iti ket maibilang a panangadmitir ti gobierno a palpak dagiti inpatpatungpal da a programa iti napalabas a tawen tapno maipababa ti presyo ti bagas iti pagilian.
Karaman kadagiti dinakamat ni Estavillo nga inpatungpal ti gobierno a programa ket ti panaglako ti “Nutri Rice”, ‘Sulit Rice”, Rice for All a nailako iti 40 a pisos iti kada kilo, kasta pay ti panaglako ti 29 a pisos iti kada kilo kadagiti Kadiwa Stores.
Malaksid kadagitoy ket naipababa ti taripa ti bagas ken adda pay ti naipatungpal a Maximum Suggested Retail Price para kadagiti imported a bagas.
Nupay kasta, inpetteng ni Estavillo a saan a nakatulong dagitoy a programa tapno maipababa ti presyo ti bagas iti pagilian.
Kuna na a ti itutudo dagiti kameng iti kamara de representantes a rason no apay a saan a bumabbaba ti presyo ti bagas iti pagilian ket gapu iti profiteering, hoarding ken price manipulation.
Para iti Bantay-Bigas, agingga a maipatpatungpal ti Republic Act (RA) 11203 wenno Rice Liberalization Law no sadinno nga inikkat na ti mandato iti National Food Authority (NFA) a mang-regulate ti presyo ti bagas ken naipasa iti pribado ti pannakaimanihir manipod iti importasyon, panaggatang ti irik kadagiti mannalon, ken isudan ti mangidikdiktar ti presyo ti nasao a produkto.
Innayon na a ti laeng iggem ti gobierno ket ti buffer stock no sadinno nga agarop 3 a porsiento manipod iti nationally produced a bagas ti kabaelan da a gatangen.
Kabayatanna, inpetteng ni Estavillo a bassit paylaeng dagiti lokal a gobierno a nagpirma iti Memorandum of Agreement iti nagbaetan da iti gobierno para iti panaglako da ti nalaklaka a presyo iti bagas.
Inpalgak na pay a saan a mandato ti Local Government Unit nga aglako ti bagas gapu ta nayun a cost of production da daytoy gapu iti handling ken nayun a manpower ti kasapulan.
Maipalagip nga iti babaen ti National Food Security Agency ket iparuk-at ti National Food Authority ti stock na a bagas nga umabot iti 300 a ribo a metriko tonelada ken mailako dagitoy babaen kadagiti Local Government Units ken Kadiwa Stores iti presyo a nababbaba ngem iti market price.
