LAOAG CITY – Rinugiananen ti lokal a gobierno ditoy siudad ti Laoag ti pannakadalos dagiti water lily iti brgy. Cataban ken Caoacan ditoy siudad ti Laoag.
Segun ken ni Mayor James Bryan Alcid, agarup daytoy ti maysa kadagiti nakitada a posible a rason iti panaglayus ditoy siudad idi napalabas a panagtutudo.
Kunana a dagiti water lily ti manglapped iti naannayas a panagayus ti danum a rumuar manipud iti sentro ti siudad.
Inbataddna a kangrunaan kadagiti timmulong iti ininnot a pannakaikkat kadagiti nasao a sullat ket ti Department of Public Works and Highways (DPWH) ken dagiti dadduma pay a maseknan nga ahensia iti lokal a gobierno.
Inlawlawagna a kasapulan ti pannakaikkat dagiti nasao a water lily sakbay daytoy a matuduan gapu ta sabali ti agbalin a kalidadna dagitoy no mabasa.
Innayonna pay a kalikagumda pay a maikkat dagiti dadduma pay a banag a mabalin a maka-abbeng ti danum aglalo kadagitoy a panawen ti panagtutudo.
