LAOAG CITY – Nailungalong iti Kamara de Representantes ti gakat nga ikkaten ti Value Added Tax wenno VAT iti kuriente tapno maipababa ti singir kadagiti consumer.
Iti House Bill 4926 ni Leyte Rep. Martin Romualdez, kalikagumna a maamendaran dagiti sumagmamano a probision ti National Internal Revenue Code tapno aramiden a VAT-exempt ti panaglako ti kuriente ti generation, transmission ken distribution companies pakairamanan ti electric cooperatives.
Iti agdama a sistema, maipatpataw ti VAT iti kada tukad ti power supply chain nga agresulta kadagiti “compounded tax cost” ken maipabpabaklay kadagiti consumer.
Inbatad ni Romualdez a ti Value Added Tax ket maysa kadagiti kangrunaan a rason ti nangato a singir iti kuriente iti pagilian.
Inlawlawagna a no maikkat ti Value Added Tax ket direkta a bumaba ti presio ti kuriente ken makissayan ti gastosen dagiti Pilipino.
Makatulong pay daytoy tapno ngumato ti purchasing power ti publiko, mapapigsa ti lokal nga ekonomia ken dagiti negosio, mapaadu dagiti trabaho ken dadduma pay.
Ti nasao a gakat ket nakapenpen iti House Committee on Ways and Means.
