LAOAG CITY – Indauloan ni Presidente Ferdinand Bongbong Marcos Jr. ti pannakairubuat ti Sulvec Small Reservoir Irrigation Project iti Brgy. Sulvec iti ili ti Pasuquin.
Segun ken ni Pres. Marcos, daytoy a proyekto ket karaman iti 900 a milyon a pisos a pundo nga inlatang ti gobierno tapno matulungan dagiti naruay a mannalon iti intero a pagilian.
Inbatadna a babaen iti daytoy a proyekto ket kabaelanna a a mapadanuman ti agarup 705 nga ektarya iti kataltalonan no sadino dumanon iti sumurok maysa a ribu a mannalon ti mabenepisiaran.
Kunana nga adda ti 10 a barangay iti ili ti Pasuquin ti mabenepisiaran iti daytoy a proyekto a pakairamanan iti Brgy. Sulvec, Poblacion 4, Nagsanga, Salpad, Nalvo, Susugaen, Estancia, Pragata, Sulongan ken Caruan.
Inlawlawagna a ti 334 a milyon a pisos a Sulvec Small Reservoir Irrigation Project ket pakairamanan ti pannakaipasdek ti 32 a metro nga Earthfill Dam ken ti Apperture Structures.
Malaksid iti daytoy, inpakaammo ni Pres. Marcos a gagem daytoy a proyekto tapno mapangato pay ti produksion ti agrikultura babaen iti kanayonan a lugar a mapadanuman iti baet ti mapaspasaran a kinakurang ti pagpadanum nga aggapu iti irigasion.
Innayon ti Presidente a makatulong pay ti nasao a pasilidad iti panangkontrol iti layus babaen iti panag-impound kadagiti danum manipud iti tudo wenno bagyo tapno mausar kas irigasion.
Mainaig iti daytoy, kuna ni Mr. Romeo Dancel, Presidente ti Zanjera Susugaen a dakkel a tulong daytoy para kadakuada a mannalon nga isu ti pangalaanda ti pagpadanum kadagiti mulada iti kataltalonan.
Kabayatanna, inbatad ni National Irrigation Administrator Engr. Eduardo Guillen a ti Sulvec Small Reservoir Irrigation Project ket papigsaenna ti watershed a mang-recharge iti aquifer iti lugar a maminsan manen a makatulong iti panangpapigsa ti biodiversity.
