LAOAG CITY – Kalikagum dagiti benepisyaryo ti Cash for Work Program ti gobierno probinsial iti Brgy. Nalbo ditoy siudad ti Laoag a maawat ti sweldo da.
Daytoy ket kalpasan nga awan pay a pulos ti naawatda a sipud idi Setiembre itay napan a tawen.
Segun iti maysa kadagiti benepisyaryo a ni Ms. Joy Sebastian, nagpaot iti lima nga aldaw ti panagdaldalus da iti barangay iti nasao a bulan.
Nu pay kasta, inbatad na nga agpapan ita ket awan pay a pulos ti naawatda a sweldo.
Naamoan nga umabot iti 41 dagiti nagbalin a benepisyaryo ti Cash For Work Program iti nasao a barangay ken manamnama nga umawat ti 255 a pisos a sweldo iti kada aldaw ti tunggal benepisyaryo.
Inpakaammo ni Sebastian nga inyuman da ti nasao a banag kadagiti opisyal ti barangay ken nabalakan laeng dagitoy nga aguray.
Mainaig iti daytoy, inadmitir ni Mr. Christopher Tapnio, ti officer in charge iti Provincial Environment And Natural Resources Office a saan pay a naited ti sweldo dagiti 41 a benepisyaryo ti cash for work program iti Brgy. Nalbo.
Nu pay kasta, kuna na a kumpleton dagiti dokumento a kasapulan sakbay a maiproseso ti sweldo a maawat dagiti benipisyaryo iti mismo a provincial treasury office.
Immunan nga inlawlawag na nga adda ti pannakaitantan ti pannakaipaay ti sweldo dagiti benepisyaryo gapu iti return to sender (RTS) nu sadino a sumagmamano kadagiti benepisyaryo ket saan a dagus a nakaipasa iti kasapulan a dokumento idinto a kurang ti dadduma.
Kuna na a gapu iti daytoy ket adda ti pannakaitantan ti pirma ni Mrs. Estrella Baby Sacro , ti dati nga OIC iti nasao nga opisina.
Kabayatanna, inbatad ni Tapnio a manarimaan ti koordinasyon da iti opisina ti gobernador para iti pannakaited ti sweldo dagiti benepisyaryo ti Cash for Work Program.
Naamaoan a kadagupan a 1,275 a pisos ti maawat iti tunngal benepisyaryo para iti lima nga aldaw a panagdalus dagitoy.
