LAOAG CITY – Maisubli ita a tawen ti pannakaipaay ti pammadayaw kadagiti tallo a kangatoan iti “gold medal standing” ti Region One Athletic Association meet”.
Daytoy ti inpakaammo ni Atty. Donato Balderas, schools division superintendent ti Dept. of Education Division of Ilocos Norte.
Imbatadna a daytoy ti kaunaan a gundaway nga adda manen dagiti mabigbig nga “overall winners” iti Region One Athletic Association meet sipud naisardeng idi tawen 2017 wenno 2018.
Inlawlawagna a napanunut da nga isubli daytoy tapno makagun-ud ti nasao nga aktibidad ti ad-adu a suporta manipud kadagiti Local Government Units.
Mainaig iti daytoy, impeksa ni Mr. Faivo Bartolome, sports consultant ti Ilocos Norte Sports Development Office ti panangnamnamana a mapasubli ti Ilocos Norte ti kampeonato iti Region One Athletic Association meet.
Maipalagip a nabayagen a tawen a saan a nagkampeon ti Ilocos Norte iti Region One Athletic Association meet nupay daytoy ti runner up itay napalabas a tawen.
Iti baet daytoy, impalgak ni Bartolome a puntiria a maiyalat dagiti tallo a division ditoy probinsia dagiti kangatoan a pammadayaw gapu ta ti nasao a pasy-ayam ket naisayangkat a mismo ditoy Ilocos Norte.
