LAOAG CITY – Ibilang ni Father Arvin Mangrubang iti Samahang Para sa Reporma ng Kooperatiba ditoy probinsya a ti kellaat a pannakaipababa iti nasurok a 3 a pisos ti kada kilowatt hr a singir iti kuryente ket pangep-ep laeng ti bara ti umili iti pudno nga isyu a sangsangwen iti Ilocos Norte Electric Cooperative a pannakapagbalin na a pribado.
Inlawlawag ni Mangrubang nga iti naglabas a lawas ket agarop makalawas a nagpukaw ti suplay ti kuryente iti intero a probinsya gapu kadagiti agsasaruno a bagyo.
Kuna na a gapu kadagiti napaspasaran a kalamidad ket saan unay a dakkel ti nakonsumo a kuryente dagiti umili ken adda ti epekto ti panagbaba daytoy.
Dinakamat pay ni Mangrubang nga iti laeng napalabas a bolan ket naipublikar a maluglugi ti kooperatiba isut gapuna a masdaaw no apay a kellaat nga inpababa da ti nasurok a 3 a pisos iti singir ti kuryente iti kada kilowatt hr.
Agamak ni Mangrubang amangan no daytoyen ti maudi a pannakarikna ti umili a panagbaba ti singir iti kuryente ditoy probinsya.
Inyarig na pay ti napasamak iti Ilocos Norte Water District no sadinno a saan a napupuutan ti umili a napagbalin a pribado nga itan ket isu ti Prime Water.
Innayon na a possible a kastoy met ti suruten a pattern ti Ilocos Norte Electric Cooperative iti pannakapagbalin na a pribado.
Mainaig iti daytoy, inpetteng ni Mangrubang a masapol a ti koma kitaen iti junta probinsyal ket ti pannakaipababa ti buwis kadagiti baybayadan iti kuryente dagiti member-consumers ditoy probinsya.
Kabayatanna, atapen ti grupo ni Mangrubang nga amangan no ti pannakaipababa ti singir iti kuryente ditoy probinsya ti mapagbalin nga highlights iti State of the Province Address a maiyuswat iti kabiitan a panawen.
