LAOAG CITY – Maiyur-uray ti panangaprobar ni Gob. Matthew Marcos Manotoc iti kiddaw dagiti mangidadaulo kadagiti nagdumaduma a departamento ti gobierno probinsial para iti pannakaipabaro ti kontrata dagiti casual ken job order dagitoy.
Segun ken ni Mrs. Fe Siazon, Human Resource Management Officer ti gobierno probinsial a ti laeng awan iti lamisaan ti gobernador kadagitoy a gundaway ket ti kiddaw para iti pannakaipabaro ti kontrata dagiti agpapaay iti Gov. Roque Ablan Sr. Mem. Hospital a paggapoan ti kaaddoan nga empleado.
Inlawlawagna a ti katengngaan pay laeng ti bulan ti Nobiembre ket pinalagipannan dagiti mangidadaulo kadagiti nagdumaduma a departamento a mangisubmitir iti kiddawda ken ni Gob. Manotoc kagiddan ti “Employees Performance Evaluation” a pagbasaran ti HR ken ti gobernador iti pannakaaprobar ti pannakaipabaro ti kontrata dagiti empleado.
Kunana nga umab-abot iti 600 dagiti empleado a maipabaro ti kontratada.
Kunana a nasursuruk ngem 300 dagiti Job Order idinto a nasursuruk ngem 200 dagiti casual.
Innayon ni Siazon a karamanen iti nasao a bilang dagiti empleado kadagiti hospital ditoy probinsia.
