LAOAG CITY – Mabalinen a maawat dagiti agpapaay ti gobierno ti nayon a sueldoda ita a tawen.
Segun ken ni Budget Secretary Amenah Pangandaman, iyur-urayda laengen ti Palasyo ti Executive Order para iti daytoy.
Rumrummuar a dumanon iti P36 a bilyon ti nailatang a pundo para iti salary adjustment iti babaen ti Personnel Services Expenditures ti Fiscal Year 2024.
Inlawlawag met ti sekretario a retroactive ti salary adjustment dagiti agpapaay iti gobierno manipud idi Enero iti agdama a tawen ngem saanna a masinunuo no mano ti pagngatoan iti sueldo.
Para met inton sumaruno a tawen, kunana a nangilatang ti Department of Budget and Management ti P70 a bilyon para iti sumaruno a tranche ti salary adjustment kadagiti agpapaay ti gobierno pakairamanan ti pannakaipangato ti sueldo para kadagiti mangisursuro.
Malaksid iti pannakaipangato ti sueldo, adda pay ti manamnama a P7,000 cash a medical allowance kadagiti agpapaay ti gobierno no sadinno dumanon iti P9.6 a bilyon ti inyalokar a pundo para iti daytoy.
Inpetteng met ni Pangandaman a napateg a maikkan ti naan-anay nga atension ti salun-at dagiti agpapaay ti gobierno.
