LAOAG CITY – Nagkiddaw ti pammakawan ni Gov. Matthew Marcos Manotoc kadagiti amin a nagkomento iti Facebook kalpasan a naiparuk-at ti executive order seknan iti baro a protocols.
Kuna na nga ammo na a mauman dagiti tattao gapu iti pandemiya.
Gapu iti daytoy, inlawlawag ni Manotoc a maituloy iti pannakaidalan iti antigen test dagiti naggapu kadagiti lugar nga adda iti babaen ti ECQ, MECQ, ken GCQ agraman dagiti Returning Overseas Filipinos.
Kuna na a ti proposal ket saan nga inkapilitan nga adda dagiti agquarantine iti pasilidad wenno iti pagtaengan ngem ketdi masapul nga addaan da iti negatibo a resulta ti RT-PCR wenno Antigen test.
Para kadagiti ROFs ken naggapu iti high risk areas, ket maikiddaw a dumalan da iti Antigen test sakbay a sumrek da ditoy probinsya.
Inbatad ni Manotoc a masapul a suruten dagiti maseknan a naggapu iti high risk areas a limitaran da ti garaw dagitoy iti las-od ti maysa a lawas.
Inlawlawag na a saan a quarantine daytoy ngem ketdi rekomendasyon laeng ken masapul a negatibo da iti antigen test.
Kabayatanna, sungbatan ti gobyerno probinsyal ti magastos iti idadalan dagiti ROF wenno LSI a napukawan ti trabaho nangruna dagiti maibilang nga indigent.
Inbunannag na a nangaramid dan iti COVID hotline ken email, a pangkitaan da kadagiti request para iti subsidy wenno reimbursement kadagiti napilitan a nagbayad para iti testing ken panagquarantine iti kallabes.
Iti biang ti turismo, maminsan laeng a dumalan iti antigen test dagiti sumrek nangruna dagiti aggapu iti Metro Manila ken dadduma pay.
Inpetteng ni Manotoc a saan pay a pinal wenno saan pay nga epektibo dagiti lungalong na ngem ketdi kasapulan a maadal iti provincial board, dagiti mayor, frontliners ken dadduma pay a maseknan.
Innayon na a ti epektibo ket dagiti manarimaan ti panagquarantine na iti pasilidad ket mabalin da nga ileppas ti panagquarantine da iti pagtaengan, adda wenno awanan da iti testing.
Immunan a naruay dagiti negatibo a komento iti facebook daytoy kalpasan a naiparuk-at ti baro a protocol.
Kuna ni Gov. Manotoc a kalikagum na laeng a maprotektaran ti probinsya manipud iti COVID-19 rason nga arig a saan a nagbaliw dagiti protocol.
Iti sabali a bangir, inpasingked ni Dr. Norman Rabago, COVID-19 consultant ditoy probinsya, a manamnama ti pannakabalbaliw ti immunan nga inparuk-at ti gobyerno probinsyal a baro a protocols.
Kuna na a consultative ti wagas a pannakaipatungpal dagiti baro a protocol saan laeng nga iti bukod a desisyon.
Segun kenni Dr. Rabago, maysa a sagsaganaan da ti possible a panagwaras ti UK variant nangruna no naluklukayen dagiti protocol gapu ta possible panagawid dagiti adda idiay abroad.
Kuna na nga arigen a nalipatan dagiti tattao iti pannakairekord ti umuna a kaso ti UK variant ditoy probinsya no sadinno maysa nga ROF a naggapu iti Bahrain.
Inbatad ni Dr. Rabago a saan nga agkumpiyansa ti probinsya gapu iti pannakairekord ti UK variant iti kallabes.
