LAOAG CITY – Aprobadon iti Sangguniang Panlalawigan ti pannakaiparuk-at ti nabatbati a pundo ti Gobierno Probinsial ti Ilocos Norte a nasurok 12 milyon a pisos a mausar a paggatang para iti COVID-19 vaccines a mausar para kadagiti kaprobinsiaan malaksid laeng dagiti bakuna nga aggapu idiay Gobierno Nasional.
Daytoy ket kalpasan a dagiti 12 nga agpanpanday linteg ti sangkamaysa a nangpabor ti pannakaaprobar iti daytoy a gakat idinto a saan a nakabutos ni Senior Board Member Dr. Medeldorf Gaoat gapu ta saan daytoy a nakaatendar iti naisayangkat a Regular Session ti Sangguniang Panlalawigan.
Segun ken ni ABC Federated President ken Chairman ti Committee on Barangay Affairs Elmer Faylogna, ti nasao a kantidad ket pundo nga immuna a nailatang para kadagiti programa ken proyekto ti probinsia ngem kalpasan ti pannakaibanagna ket adda ti sumagmamano a kantidad a saan a nagastos sipod idi tawen 2017, 2018, 2019 ken uray itay napan a tawen 2020.
Inbatadna nga adda ti nabatbati a pundo kalpasan a saan nga amin ket nairuar dagitoy gapu pay laeng iti pangta ti COVID-19 pandemic.
Gapu iti daytoy, maiyataday a mailatang ken mausar ti nasao a pundo para iti panaggatang ti kasapulan a bakuna kontra iti COVID-19.
Mainaig iti daytoy, inlawlawag ni Mr. Pedro Agcaoili, ti Provincial Planning Development Officer a napusgan ti Task Force Salun-at ditoy probinsia a mangarisit no siasino dagiti mapili a mabenepisiaran iti magatang a COVID-19 vaccines.
No pay kasta, kunana a saanna met pay a masinunuo no ania a klase ken mano a bakuna ti gatangen ti Gobierno Probinsial gapu ta mannarimaan pay laeng ti pannakikoordinarna iti Task Force Salun-at.
