LAOAG CITY – Naitantan ti pannakaipatakder dagiti poste ti kuriente a maikonektar iti SM Mall ditoy siudad ti Laoag.
Daytoy ti inpakaammo ni Mr. Cipriano Perry Martinez, Acting General Manager ti Ilocos Norte Electric Cooperative (INEC).
Inlawlawagna a saanda nga insigida a nakasapol ti right of way a nangitunda ti pannakaitantan ti pannakaipatakder dagiti poste ti kuriente iti nasao a dakkel a mall.
Mainaig iti daytoy, inbatad ni Martinez nga agdagup iti 60 a poste ti maipatakder a direkta iti substation-da iti ili ti San Nicolas no sadinno adda ti mausar a 3.5 agingga 7 megawatts manipud iti substation a 15 megawatts.
Kunana a kalikagumda a maikamakam daytoy sakbay ti paskua ngem kasapulan nga awan ti tumaod a problema nangruna ket adda dagiti pribado a lote wenno kapagayan a maapektaran iti pannakaipatakder dagiti poste.
Innayonna a marugian ti pannakaipatakder dagiti poste apaman a makaapit dagiti mannalon ken nabayadanda met daytoy.
