LAOAG CITY – Nabara ti nagbalin a diskusyon iti uneg ti session hall bayat ti public hearing a naiyuswat seknan ti pannakaipatakder ti cell site iti Brgy. 51 – A, Nangalisan ditoy ciudad ti Laoag.
Daytoy ket gapu ta ado dagiti saludsud dagiti sumagmamano a residente iti nadakamat a barangay seknan iti possible nga epekto iti salun-at da ti radiation manipod iti cell site.
Malaksid iti daytoy, nakwestyunaran pay ti maipagarop a saan a pannakasurot ti proseso ti pannakaipatakder ti cell site.
Ad-adda pay a bimmara ti diskusyon kalpasan nga inadmitir ti maysa a barangay kagawad nga awan ti naaramid a resolusyon ken naisayangkat a public hearing seknan ti pannakaipatakder ti cell site.
Maipalagip nga inpasingked dagiti opisyal ti nasao a barangay a nailawlawag a naimbag kadagiti bumarangay ti nasao nga addang.
Nupay kasta, maadal a naimbag daytoy iti regular session sakbay a madesisyunan.
