LAOAG CITY – Inbatad ni Bombo International News Correspondent Anna Beth Santilla idiay Belgium a napalaos ti ragsak da ken nagenjoy da iti pannakitaripnong da kenni Pres. Ferdinand Bongbong Marcos Jr. ken ti delegasyon daytoy.
Segun kenni Santilla, nangrugi pay laeng iti alas-dos iti malem, oras idiay Belgium ket nagsangpeten dagiti Filipino iti nagduduma a paset ti nasao a pagilyanken adda pay iti naggapo iti sabali nga Eurepoan countries.
Inlawlawag na a nangrugi ti programa babaen iti panagpabuya dagiti talentado a Pilipino agingga a simmangpet ti presidente iti pasado alas-sais.
Mainaig iti daytoy, kunana a gapo met iti ragsak da ken limitado laeng ti oras ket awan metten ti naited a gundaway nga ibaga da a mismo ti kalikagom da.
Nupay kasta, inbatad na a maysa kadagiti pakaragsakan da ket ti plano a pannakaipatakder iti Europe ti opisina ti Dept. of Migrants Workers.
Maysa pay kadagiti pakaragsakan ken ur-urayen da ket ti panagtaripnong ni Pres. Marcos ken ni King Philippe.
Naamoan a kalpasan ti panagbitla ni Pres. Marcos ket bimmaba manipud iti entablado ken nakialamano ken nakipicture kadagiti Pilipino.
