LAOAG CITY – Inlawlawag ni International Bombo Correspondent Manny Pascua ti pannakaipatungpal ti “no fly zone” idiay Puna District, Big Island, Hawaii.
Kuna na a naipatungpal ti “no fly zone” gapu iti agtultuloy nga eruption wenno panagpuswak ti lava manipud iti daga idiay Leilani Estates.
Iti nakalap nga impormasyon ni Pascua, napigsa iti panagpuswak ti lava gapu ta maiyarig iti tallo a nagtutuun a poste ti kuryente iti katayok na.
Inbatad na a babaen ti pannakaipatungpal ti “no fly zone” iti nasao a distrito ket tapno maliklikan ti pannakadesgrasya dagiti helicopter nga agipasyar kadagiti turista.
Inpakaammo ni International Bombo Correspondent Manny Pascua a naipatungpal ti danger zone iti sumagmamano a paset ti Pahoa Town a sakop ti Puna District, Big Island, Hawaii.
Daytoy ket gapu ti agtultuloy a panagpuswak ti lava a nakaapektaran dagiti kalsada, panagserra dagiti pasilidad ken nakapooran dagiti siam a pagtaengan iti nasao a lugar.
Segun kenni Pascua, no agtultuloy ti panagpuswak ti lava ken agayus ket dumanon kadagiti papaya a mula dagiti Pilipino kangrunaan dagiti Ilokano ken dalapusen na ti Geothermal Plant.
Kuna na a no malabsan na dagitoy ket tumapwak iti baybay.
Innayon ni Pascua a maibilang a nakarkaru nga amang ti agdama a mapaspasamak iti nasao a lugar ngem iti isu met laeng nga insidente idi tawen 2014 gapu ta umaboten ti 10 a lugar iti pagpuspuswakan ti lava.
