LAOAG CITY – Inpetteng ni Department of Education (DepEd) Secretary Sonny Angara a masapol nga urnusen ti pannakapaipatungpal ti Universal Access to Quality Tertiary Education Act, ti linteg a manggarantiya ti libre a matrikula iti kolehiyo tapno maikkat dagiti nababaknang nga estudyante ken dagiti laeng deserving ken marigrigat nga agad-adal ti maipaayan ti subsidiya.
Inpaganetget ni Sec. Angara a napateg ti pannakaurnus iti pannakaipatungpal ti linteg gapu ta ti resources para iti sektor ti basic education ket nagbalin a naingpis kalpasan a naipalawa ti subsidiya iti kolehiyo.
Inyarig ti sekretaryo nga uray dagiti estudyante iti University of the Philippines ket ‘tuition free’ ngem no kitkitaen ket ado dagiti estudyante iti unibersidad a naggapo iti nababaknang a pamilya.
Inpetteng ni Angara a saanen a kasapulan nga i-subsidize ti gobierno dagiti babaknang nga estudyante, banag nga ar-aramiden ti agdama nga implementasyon ti linteg.
Mainaig iti daytoy, inbatad pay ti sekretaryo ti Department of Education a masapol a tutukan laengen ti gobierno nga ipaayan ti libre a college education dagiti deserving nga estudyante ken lapdan a makaala ti subsidiya dagiti saan nga agkasapulan iti daytoy iti baet ti panagado ti bilang dagiti underprivileged students iti kolehiyo nga agdrop-out ti kada tawen gapu ta awan ti pagmatrikula da.
Iti datos ti Commission on Higher Education (CHED) idi 2023, adda ti nasurok a 2 a milyon nga state universities and colleges (SUC) students ti nakaawat ti libre a tertiary education iti 200 nga institusyon iti intero a pagilian.
