LAOAG CITY – Naannayas ti pannakaipatungpal ti No-Movement Day ditoy siudad ti Laoag ita nga aldaw ti domingo.
Daytoy ti inbatad ni PLt. Col. Rafael Lero, ti hepe ti PNP ditoy siudad.
Nu pay kasta, kuna na nga adda dagiti natiliw ken nagmulta gapu iti panaglabsing ti covid-19 protocols.
Mainaig iti daytoy, inbunannag ni Lero nga ad-adda a napaigetan ti pannakabantay kadagiti checkpoints nu sadino a dagiti laeng adda ti nasisita a pagturunganna ti mapalubusan a rumuar.
Innayun na a babaen ti No-Movement Day ket naiyuswat ti disinfection kadagiti establishimento ditoy siudad.
Inlawlawag na a daytoy ket maiyuswat iti kada domingo agingga a saan a maikkat ti naipatungpal a Localized Enhanced Community Quarantine.
Kabayatanna, immunan nga inbatad ni Lero a masapol a maikonsiderar ti ekonomiya iti pannakaipatungpal ti No-Movement day.
Daytoy ket kalpasan nga adda dagiti nangirekomendar a saan laeng a maysa nga aldaw ti panagdis-infect ditoy siudad ngem uray dua nga aldaw wenno ad-addo pay.
