LAOAG CITY – Naisayangkat ti public hearing iti Sang Panlalawigan mainaig iti panaglako ti vape ken sigarilyo ditoy probinsya.
Segun ken ni Dr. Medeldorf Gaoat, ti Chairman ti Committee on Health iti Sang Panlalawigan, karaman kadagiti nakipaset iti public hearing ket dagiti Vape Store Owners, Department of Trade and Industry, Department of the Interior and Local Government ken dagiti kameng ti Sang Panlalawigan.
Inlawlawag na a ti maysa kadagiti napagsasaritaan da ket ti naiget a pannakaipawil ti panaglako ti vape ken sigarilyo kadagiti menor ken maipawil ti agaramat kadagitoy a proyekto kadagiti pampubliko a lugar.
Innayon na a ti pay kayat da a makontrol ket ti pannakailako dagiti vape iti online babaen kadagiti unregistered owners.
Gapu iti daytoy, kuna ni Gaoat a malaksid iti Department of Trade and Industry ken Department of the Interior and Local Government ket kiddawen da pay ti tulong dagiti nagduduma a barangay, Philippine National Police, Department of Education ken dadduma pay a maseknan nga ahensya ti gobierno ken organisasyon tapno masigurado a maipatungpal ti kalikagom da a maiyadayo wenno mailiklik iti panagusar ti vape dagiti menor de edad ditoy probinsya.
Nagballaag ni Gaoat nga umabot iti 5 a ribo a pisos ti maipataw a multa kadagiti aglako ti vape kadagiti menor de edad ken dagiti maduktalan nga aglako iti online a dagitoy ket saan a nakarehistro.
Mainaig iti daytoy, kuna ni Gaoat a kas maysa a doktor ket malaarma gapu ta ngumatngato ti kaso dagiti pulmonary diseases, aglalo ket napaneknekan a ti vape ket adda ti negatibo nga epekto na iti salun-at.
Binalakadan na dagiti agtutubo nga isardeng ti agusar ti vape wenno sigarilyo gapu ta mabalin a dumteng ti panawen a pagbabaywan daytoy nga ar-aramiden da.
