LAOAG CITY – Inlawlawag ni Atty. Kidd Castro a saan a kayat a sawen a no mapilaan ti maysa a tao a karaman iti desgrasya ket isun ti akin-basol uray pimmusay ti biktima.
Palawag na daytoy kalpasan nga adda dagiti arungaing ti kaadoan a no adda ti pumusay iti desgrasya ket ti nakadinnungpar na ti matiliw ken makapilaan ti kaso.
Segun kenni Castro, ti pannakaipila ti kaso iti korte ket tapno malawlawagan ken mapaneknekan no daytoy ti nagbasol iti napasamak a desgrasya.
Inpetteng na a gapo ta adda ti natay ket isu ti matulungan para iti pannakapila ti kaso.
Nupay kasta, adda met ti iyuswat ti pulisya nga imbestigasyon ken panagsasarita dagiti dua a partido para iti posible a pannakaareglo ngem no saan met a kayat ti maysa a partido ti makiareglo ket maipila ti kaso ken ti korte ti agdesisyon.
Kabayatanna, innayon na a no met ti napagsasaritaan ket ti damages, adda met ti computation a naiyataday iti linteg nga isu ti bayadan ti maseknan ngem adda met ti maaw-awagan nga “out of court settlement” no sadinno makaammo dagiti dua a partido no mano ti pagtulagan da.
