LAOAG CITY – Posible a dumanon ti uppat nga aldaw ti Commission on Elections (Comelec) sakbay a maiproklamar dagiti mangabak a senatorial candidate iti 2025 midterm elections.
Daytoy ti inbatad ni Commission on Elections Chairman George Garcia a tallo agingga uppat nga aldaw ti maiyuray iti panagbilang dagiti butos para iti senatorial bets inton eleksion inton sumaruno a tawen.
Kunana a malaksid iti butos manipud kadagiti nagduduma a paset ti pagilian ket kasapulan pay nga iyuray dagiti butos manipud kadagiti dadduma a pagilian.
Nupay kasta, agtultuloy ti panangpalagip ti ahensia ti publiko a ti voter registration activities para iti 2025 national ken local elections ken maiyuswat inton Setiembre 30 ken saan daytoy a maiyalud-od.
