LAOAG CITY – Matuloy ti pannakaiproklamar ni dati a Senador Leila de Lima kas first nominee ti Mamamayang Liberal partylist a karaman kadagiti grupo a nangabak iti kaliplippas a May 12, 2025 partylist race.
Daytoy ket iti baet iti panangbaliktad ti Court of Appeals iti desision ti nababa a pagpandayan linteg nga i-acquit wenno mawaswas ti dati a Senadora iti sangsangoenna a drug case.
Inbatad ni Commission on Elections Chairman George Erwin Garcia nga awan ti makitkitada a rason tapno masuspenso ti pannakaiproklarmar ni De Lima.
Inlawlawagna a saan pay a ‘convicted with finality’ ni De Lima a mabalin a manglapped kenkuana iti panangiggem ti maysa a posision iti gobierno isu nga awan ti epekto ti desision ti Appellate Court iti pannakaiproklamarna.
Maipalagip nga idi Huebes, nangiruar ti ruling ti CA-8th Division ken binaliktad ti desision ti Muntinlupa Regional Trial Court a mangwaswas ken ni De Lima iti sangsangoenna a drug case.
Naammoan a ni De Lima ti kaunaan a nominado ti Mamamayang Liberal a nakagun-od ti butos a 547,949.
Inkeddeng ti Commission on Elections ti pannakaiproklamar dagiti partylist groups a nangabak iti eleksion inton Lunes, Mayo 19.
