LAOAG CITY – Balligi iti pannakaiwayat iti Grand Float Parade kas paset iti Pamulinawen Festival ditoy ciudad ti Laoag.
Nagyaman met ni Mayor James Bryan Alcid dagiti amin a nakipaset iti nasao nga aktibidad.
Maragsakan ti mayor gapu iti nagbalinan a resulta dagiti floats manipud kadagiti dekorasion a naaramid kadagitoy.
Mainaig iti daytoy, kuna ti mayor a ti nasao nga aktibidad ket nakakitaan iti kinalaing iti tunggal laoageño.
Kabayatanna, inawis manen ti Mayor dagiti umili ti papanda panagbuya kadagiti aktibidad ita nga aldaw aglalo iti maiwayat a street dance competition, kalesa parade ken dadduma pay.
Inbatad na a naragsak daytoy gapu ta mabuya ken maitampok iti pakasaritaan iti tunggal barangay ken ti sibubukel a ciudad.
Inmuna iti daytoy, iti small float category ket nagun-od ti Brgy. Mariquet iti ili ti Solsona ti umuna a pwesto a nangabakan da ti 50 ribo a pisos; 2nd place iti Caterpillar School a nakaiyawidan da met ti 35 a ribo a pisos ken 3rd place ti Philippine Coconut Authority a nakaawat met ti premyo a 25 ribo a pisos.
Iti met Big float ket nagun-od ti 3rd North Point Alliance Corporation ti maikatlo a pwesto a nangabakan da ti 50 ribo a pisos; 2nd place ti Barangay Naglicuan iti ili ti Pasuquin a nangabak ti 80 ribo a pisos ken ti 1st place ket ti Regasco a nakaiyawid ti 100 a ribo a pisos.
