LAOAG CITY – Agbiruk pay ti gobyerno ti wagas tapno maisubli iti kabiitan a panawen ti school calendar iti daan nga iskedyul na.
Sungbat daytoy ni Presidente Ferdinand Marcos Jr., kalpasan a naalaan ti komento iti inlungalong ti sumagmamano a grupo nga isubli ti dati nga school calendar iti kabiitan a panawen.
Ti school vacation ket manipod iti Abril agingga iti Mayo gapu iti nakabarbara a panawen a paspasaren ti pagilian.
Inlawlawag ni Presidente Marcos a no mabalin ket kayat na nga isubli iti dati nga school calendar gapu ta adda ti consensus a napinpintas ti sigud nga schedule.
Inbatad ni Presidente Marcos a saanna a maipasigurado no kabaelan a maipatungpal daytoy iti sumaruno a tawen ngem agingga nga adda ti wagas tapno maisapsapa a maisubli ti dati nga school calendar ket aramiden da.
Immunan nga inbatad ni Vice President at Education Secretary Sara Duterte a ti pannakaisubli ti dati nga school calendar ket saan a rumbeng nga iyalisto gapu iti konsiderasyon para iti “rest periods” dagiti estudyante ken mangisursuro.
