LAOAG CITY – Awan ti problema iti pannakaisubli ti subpoena powers ti PNP Chief ken ti Criminal Investigation and Detection Group kangrunaan iti CIDG Director ken ti CIDG Deputy Director for Administration.
Daytoy ti inbatad ni Atty. Ferdinand Ignacio iti pannakiuman kenkuana ti Bombo Radyo Laoag mainaig ti RA 10973 wenno pannakaipaay ti subpoena power ti PNP-CIDG a pinirmaan ni Presidente Rodrigo Roa Duterte idi Marso 1.
Kuna na a gagangay laeng a maaddaan ti subpoena power ti PNP ken CIDG kas iti National Bureau of Investigation nga addaan karbengan a mangiparuk-at ti subpoena a mangkidkiddaw nga agparang ti maseknan ken dagiti dukomento a kasapulan para iti pannakaimbestigar ti kaso.
Segun kenni Ignacio, agpada ti subpoena power ti NBI ken iti PNP-CIDG.
Malaksid ti NBI adda pay ti subpoena power ti Bureau of Internal Revenue.
