LAOAG CITY – Nangipeksa ti panagdanag ni House impeachment team adviser ken spokesperson Ace Barbers iti pannakaitantan ti impeachment trial ni Vice President Sara Duterte gapu iti dakes a paniempo.
Segun ken ni Barbers, nakaapektar dagiti suspension iti panangusig iti presentasion ti ebidensia ken iti panagdur-as ti kaso iti Senate impeachment court.
Kunana a maawatan ti prosekusion ti suspension gapu iti napigsa a tudo ken panaglayos ngem mangnamnama daytoy ti insigida a pannakaituloy ti panagusig no napintasen ti paniempo.
Masapul kuma nga ituloy ti House prosecutors ti direct examination ken ni dati nga Office of the Vice President special disbursing officer Gina Acosta a naideklarar kas hostile witness idi Lunes, Agosto 17.
Timmestigo ni Acosta a maipagarup nga imbilin daytoy ni Duterte nga i-turn over ti P125 milyon a confidential funds ken ni Col. Raymund Dante Lachica.
