LAOAG CITY – Inpakaammo ti Mariano Marcos Memorial Hospital and Medical Center iti ciudad ti Batac a temporaryo a nasuspenso ti panagawat da kadagiti walk-in patients a dumalan ti swab test.
Daytoy ket gapu ti kaadu dagiti swab samples a maaw-awat ti Molecular Biology Laboratory gapu iti contact tracing ditoy probinsya ken kadagiti kabangibang a probinsya kasta pay iti naituding a pannakadecontaminate ti nasao a laboratoryo.
Gapu iti dayta ket adda ti pannakaitantan ti pannakarelease ti resulta ti RT-PCR official laboratory test manipod iti dati a 24 nga oras agingga iti 72 nga oras, itan ket mairelease ti resulta kalpasan ti 72-hour time-frame.
Nupay kasta, inbatad ti management ti nadakamat nga ospital nga ububraen dagiti laboratory personnel iti kabaelan tapno dagus a marelease ti resulta ti test.
Napasingkedan pay a ti negatibo a resulta iti RT-PCR test ket saan pay laeng a sigurado ti kinatalged ti maysa a tao.
Naamoan a kasapulan ti regular a panagugas ti ima, physical distancing, panagtalinaed iti balay ken liklikan non-essential travels.
