LAOAG CITY – Naiyuna a naikkan ti sangaribo a pisos dagiti maibilang a rural barangay iti kada household ditoy siudad ti Laoag ita nga aldaw.
Daytoy seknan ti addang ti lokal a gobyerno ditoy siudad ti Laoag a matulongan dagiti marigrigat nga awanan ti pamastrekan da agraman dagiti agsardeng ti panagtrabaho da gapu ti enhanced community quarantine.
Iti nakalap nga impormasyon ti Bombo Radyo Laoag, nabuangay ti innem a grupo a napusagan a mangited sangaribo a pisos kadagiti napili nga household.
Ti grupo ket karaman dagiti dua a konsehal a saan nga agpada ti partido na.
Iti statement ni Vice Mayor Vicentito Lazo, babaen iti daytoy ket tapno maaddaan ti check and balance para ti pannakaited ti sangaribo a pisos.
Kalpasan a mabunongan dagiti rural barangay ken maisaruno dagiti urban barangay a maikkan ti tulong pinansyal.
Malaksid iti daytoy, mairagpin ti panagpapirma dagiti maseknan a grupo ti form kadagiti residente para ti social amelioration program
Maipalagip nga umabot ti 20 a ribo nga household ti maikkan ti sangaribo a pisos kalpasan a naarisit dagiti listaan ti households nga insumitir dagiti barangay.
Ti masurot a guideline ket maikkan dagiti amin a barangay tanod, displaced worker, idinto a saan a maikkan dagiti addaan ti kabbalay wenno miembro nga agtrabtrabaho.
