LAOAG CITY – Inbatad ni Ms. Marlyn Abordo iti National Intelligence Coordinating Agency (NICA) region 1 nga awan ti red tagging a mapaspasamak iti pannakaiwaras ti ladawan dagiti maipagarup a recruiter ti New People’s Army ditoy probinsya.
Segun ken ni Abordo, posible nga aramid daytoy dagiti dati a miembro ti komunista a grupo.
Patien na a kalikagum dagitoy a magutigot dagiti rebelde a sumuko gapu iti kanayun a panangkontra dagitoy iti gobierno.
Kabayatanna, kuna ni Abordo a nu pudno nga awan ti pannakainaig dagiti agwarwaras ti ladawan a maipagarup a recruiter ditoy probinsya ken mabalin ti makikoordinar dagitoy iti NICA.
Inbunannag na maysa pay nga epektibo a wagas tapno mapaneknekan daytoy ket irakurak da iti publiko nga awan ti pakainaigan da iti makakatiggid a grupo.
Immunan nga inpakaammo ni Abordo a ti red tagging ket aramid ti NPA ken daytoy ti us-usaren da a panglaban nu in-inot a madukduktalan dagiti aramidda kontra iti gobierno.
Kuna ni Abordo nga iti rehiyon 1 ket addan iti natalged a sitwasyon manipod kadagiti rebelde sipud idi Pebrero ita a tawen.
Maipalagip nga inpetteng ni Fr. Randy Manicap iti Iglesia Filipina Independiente, maysa kadagiti naakusaran a recruiter ti NPA a saanda a maaramid daytoy.
Inbatad a ti laeng armas da ket ti Bibliya ken ti pammati iti Diyos.
Mainaig iti daytoy, inbunnana pay ti maysa a maak-akusaran a ni Mr. Antonio Pugyao iti Barangay Cacafean iti ili ti Marcos ken Chairman ti Solidarity of Peasant Against Exploitation (STOP-ex) a saan a miembro iti NPA.
Patien na a ti akusasyon kenkuana ket gapu iti panagbalin na nga aktibo a makipagpaset kadagiti rally dagiti mannalon ken dadduma pay a mangilablaban ti human rights.
