LAOAG CITY – Kinumpirmaran ni Barangay Chairman Melvin Santos iti Brgy. 1 San Lorenzo ditoy siudad ti Laoag, a maad-adal ti plano a pannakaiyalud-od ti lockdown iti barangay da iti sabali pay a 14 nga aldaw.
Kuna na a maysa kadagiti possible a rason ket ti saan a pannakikooperar dagiti residente iti nasao a barangay kadagiti efforts ti barangay ken lokal a gobyerno ditoy siudad kontra iti COVID-19.
Segun kenni Santos, adda pay dagiti residente a saan na a kayat ti maipadalan iti swab test.
Inbatad ni Santos a no saan a kayat dagiti kabarangayan na a maiyalud-od ti lockdown ket rumbeng a sumurot da kadagiti maipatpatungpal a protocol.
Kabayatanna, kinumpirmaran ni Santos nga adda ti dua a residente a natiketan gapu ti panaglabsing da iti protocol ken umabot iti lima a ribo a pisos ti tunggal maysa.
Kiniddaw na kadagiti residente a sumurot kadagiti protocol tapno saan a madegdegan ti bilang ti kaso ken tapno saan a matungpal ti plano a pannakaiyalod-od ti lockdown.
