LAOAG CITY – Masapol a manayunan ti special powers ni Presidente Rodrigo Duterte babaen ti pannakaiyalud-od ti Bayanihan to Heal As One Act wenno ti RA 11469.
Daytoy ti inbatad ni Sen. Imee Marcos iti eksklusibo nga interview kenkuana ti Bombo Radyo Laoag.
Segun kenni Sen. Marcos, daytoy ket para iti re-alignment iti pondo ken maibunong kadagiti tattao gapo ta ti kalikagom na ket manayunan pay ti tulong pinansyal a mait-ited.
Inbatad na a daytoy ket tapno matulungan pay dagiti nagduduma a sektor ti naapektaran ti covid-19 pandemic.
Kuna ni Marcos, Chairman ti Economic Affairs a napagsasaritaan da iti Senado partikular ni Sen. Sonny Angara, Chairman ti Finance Committee no pangalaan da ti pondo ken no kasano ti proseso ti pannakaibunong na.
Kalikagom pay ni Marcos nga idiretso laengen kadagiti tattao ti maited a kwarta gapo ta no umutang kadagiti bangko ket ado a proseso ti maaramid.
Malaksid kadagiti naipaayen a tulong pinansyal kadagiti tattao ket rumbeng a manayunan nangruna ita nga umasideg ti panangrugi manen ti klase.
Inlawlawag pay ni Marcos a maysa pay kadagiti nasken a matulungan ket dagiti babassit a negosyo tapno saan a naan-anay nga agrikep.
