LAOAG CITY – Napalalo ti ragsak ni Mr. Perci Cendaña, 1st Nominee ti Akbayan Partylist ken dati a commissioner ti National Youth Commission gapu ta pinatgan ti Commission on Elections (COmelec) ti kiddaw da a maiyalud-od ti voter’s registration.
Inbaga na a kiniddaw da ti pannakaiyalud-od ti voter’s registration gapu kadagiti naimatangan da a sitwasyon kadagiti nagduduma a comelec centers iti intero a pagilyan.
Inpakaammo na nga iti laeng lugar da idiay Quezon City ket mangrugi iti oras ti ala-una ti parbangon ket addan dagiti mapan agpila tapno masigurado a makarehistro da.
Nupay kasta, kuna na nga addan to pelang dagiti maabutan ti cut-off ken saan a makarehistro gapu iti kaado pay dagiti saan a nakarehistro.
Ibilang ni Cendaña a ti pannakaiyalud-od ti voter’s registration ket nasapa a regalo ti Comelec iti paskua para kadagiti agtutubo.
Mainaig iti daytoy, inbaga ni Cendaña nga agarop walo a bolan ti nasayang iti panagparehistro gapu iti nagsasaruno a quarantine restrictions no sadinno a sumagmamano a milyon dagiti Pilipino ti saan pay a nakarehistro.
Mangnamnama ni Cendaña nga iti pannakaiyalud-od ti panagparehistro ti Comelec ket maakomodar aminen dagiti saan pay a nakaparehistro.
