LAOAG CITY – Inbatad ni Barangay Treasurer Richard Aglipay iti Brgy. Victoria iti ili ti Currimao a sidadaan a mangidatag kadagiti amin a dokumento mainaig iti naibunong a relief pack kadagiti kabaraggayanna.
Daytoy ket tapno malawlawagan dagiti mangkweskwestyunar iti pakabuklan a gatad ti naibunong nga ayuda.
Kuna ni Aglipay a kumpleto iti voucher ken inaprubaran ti Comission on Audit (COA) ti P175,090 a nairuar a pondo para iti ayuda babaen ti Sangguniang Kabataan.
Inbatad na a 370 dagiti nagbalin a recipients nu sadino a kangrunaan a linaon ti relief pack ket ti basic commodities.
Inpetteng ni Aglipay nga awan ti maibulbulsa a kwarta ti barangay gapu ta saanna a kabaelan nga agaramat ti saanna a nagbannugan.
Immuna iti daytoy, adda ti dimmanon a report iti Bombo Radyo seknan ti maipagarup a panagkurkurang ti gatad ti tunggal ayuda a naipaay kadagiti bumarangay nu pay adda ti P175,000 a nailatang a pondo.
