LAOAG CITY – Inpasingked ni PLt. Bjhay Calivoso, ti deputy chief of police iti PNP-Bacarra a naiget ti maipak-pakkat a pannakamonitor kadagiti dumalyasat a lugan iti national highway a masakupan ti nasao nga ili.
Daytoy ket kageddan ti panangrugi a pannakaipatungpal ti Modified enhanced Community Quarantine (MECQ) iti nasao nga ili.
Mainaig iti daytoy, kuna ni Calivoso a malaksid iti naiyestablisar a checkpoint iti nagbetngan ti Bacarra ken Pasuquin, Vintar ken Laoag ket adda pay ti naiyestablisar a checkpoint iti pagserrekan a mapan iti uneg ti poblacion.
Innayun na a temporaryo a saan pay laeng a maiparit ti panagdalyasat dagiti slow moving vehicles iti national highway agingga a malpas ti MECQ.
Kabayatanna, inpakaammo ni Calivoso nga iti panangrugi ti MECQ iti ili ti Bacarra ket dua nga indibidual ti natiliw ken nagmulta gapu iti saan a panagisuot ti face mask.
Agtultuloy ti panawagan ti deputy chief of police iti koordinasyon ken panagtulnog dagiti umuli tano malappeddan ti panagwaras ti covid-19.
