LAOAG CITY – Napaay ti pannakangiwat ti Bantay Bigas a ni Mrs. Cathy Estavillo kalpasan a saan a natungpal ni Presidente Ferdinand Bongbong Marcos Jr. iti nabayagen a singsingiren dagiti mannalon ken konsyumer maipapan iti inkarina a 20 a pisos iti kada kilo a bagas.
Segun kenkuana, basar iti maikatlo nga State of the Nation Address wenno SONA ni Pres. Marcos, inadmitirna nga awan ti mailaklako a bagas nga agbalor iti 20 a pisos iti kada kilo ti bagas kadagiti merkado publiko ditoy pagilian.
Inbatadna nga awan ti serserbina ti napintas nga istatiska no saan met laeng a marikna dagiti umili ti panagbaba ti presio dagiti kangrunaan a magatgatang.
Inlawlawagna a saan a mailinged nga iti babaen ti administrasion Marcos ket narikna ti naruay a Pilipino ti napaspas a panagngato ti presio dagiti magatgatang kangrunaanna kadagiti produkto agrikultura.
Kunana a saan a mapnek kadagiti inrakurak ni Pres. Marcos maipanggep iti benneg ti agrikultura gapu ta saan a naikkan ti kinapateg ti panangpapigsa ti lokal a produksion dagiti mannalon.
Mainaig iti daytoy, inpalgak ni Mrs. Estavillo a ti pannakaipatungpal ti 29 a pisos iti kada kilo ti bagas a mailaklako kadagiti Kadiwa centers ket saan nga agbayag no di ket manamnama pay ti agtultuloy a panagngina ti presio ti bagas.
Innayonna a maladingitan isuna nga iti baet a maibilang ti Pilipinas kas kangrunaan a rice importer iti intero a lubong ket isu met ti kanginaan ti presio ti bagas.
