LAOAG CITY – Naarestar ti Cordillera People’s Democratic Front Spokesperson Simeon “Ka Filiw” Naogsan iti Brgy. 1, Sta. Rita iti ili ti Bacarra.
Segun ken ni Fr. Randy Manicap, pannakangiwat ti Ammoyo Kappia, basar iti pamilia ni Naogsan ket adda ditoy Ilocos Norte para iti panagpaagasna.
Inbatadna a segun kadagiti otoridad ket naitaray iti kaasitgan nga ospital ni Naogsan ngem saandan a nangipaay ti naan-anay pay a detalye.
Kunana a mangnamnama daytoy nga addanto ti gundaway a maikkan ti oportunidad ti pamilia ni Naogsan a makabisita kenkuana.
Inlawlawagna a masapol a maited latta ti karebbengan ni Naogsan kas maysa a tao ken balod iti baet ti agdama a sangsangoenna.
Innayonna a ti maseknan ket maak-akusaran kas pannakangiwat ti maysa a makakannigid a grupo.
