LAOAG CITY – Agtultuloy iti panagisayangkat dagiti kameng ti PNP Piddig iti follow up investigation iti pannakapalto-paltog ti maysa nga ina iti Brgy. Buybuy iti ili ti Piddig.
Segun kenni P/Capt. King Ramos, Chief of Police iti nasao nga ili, nangidiaya ti LGU Piddig ti gunguna a 50 ribo a pisos para iti siasinuman a makaited ti impormasyon ken makaitudo iti pakabigbigan dagiti suspek.
Maipalagip a pinaltugan dagiti saan a nabigbig a nakalugan ti motorsiklo wenno riding in tandem suspect ni Fredalyn Agustin, agtawen ti 52, balo, ken residente iti nasao a barangay.
Kunana nga addan dagiti inalaan da ti statement seknan iti nasao a napasamak ken ti rumrumuar a motibo iti nangpapatayan da iti daytoy a maysa mannamay.
Inbatad na a saan da a sardengan daytoy a kaso agingga a saan da a makaala iti naan-anay nga ebidensya a mangsolbar iti pannakatay ni Agustin.
Patien ni Ramos a saan a napagtripan a napaltogan ti biktima iti kataltalonan.
Mamati ti opisyal nga adda iti naun-uneg a rason no apay pinaltogan dagiti suspek ni Agustin.
Mainaig iti daytoy, kinumpirmaran ni Ramos nga addan dagiti inisyal a nakalap da nga impormasyon no sadinno iti nagserrekan ken nagrawaran dagiti suspek.
Kunan nga addaan dagiti irevreview da a CCTV footage ken nangisayangkat dan ti imbestigasyon kadagiti posible a dimmalanan dagiti riding in tandem suspect.
Immapela ni Ramos iti publiko a no siasinnuman ti adda iti impormasyon na seknan iti nasao a krimen ket makikooperar da laeng iti pulisya.
