LAOAG CITY – Awan pay ti masinoo a motibo no apay a pinanggaep da a papatayen ni Abogado Jason Bader Perera babaen iti panangpaltog da bayat ti kaadda na iti asideg ti opisina nga adda iti asideg ti pagtaengan da iti Bgy. 6 ditoy ciudad ti Laoag
Daytoy ti inbatad ni P/Supt. Jay Deguzman, Deputy Prov’l Dir. For Administration ti Ilocos Norte Police Prov’l Office bayat ti agtultuloy a panagim-imbestigar ti nabukel a task group.
Segun ken ni Deguzman, amin nga anggulo ket kitaen da kalpasan na ket mangiwayat da ti “process of elimination”.
Inadmitir ti opisyal a saan a maikkat a maysa nga anggulo a kitaen da ket dagiti kaso a tengtenglen ti abogado nangnangruna ket kaaduan kadagitoy ket panggep ti illegal a droga.
Kuna pay ni Deguzman a posible nga aramaid ti “hired killer” ti nasao a pammaltog isuna laeng a saan da a napuruan.
Maipalagip a nagsagaba ni Perera ti dua a tama ti paltog iti bukot na a rason iti nakaitarayan na iti ospital nga iti agdama ket manarimaan a maob-obserbaran ken agapapaimbag.
Naiget met a maipapaay ti seguridad iti daytoy.