LAOAG CITY – Nagtalinaed a burburtia iti pannakapapatay ken ni Barangay Chairman Francisco Bagay Jr. iti Brgy. 5 iti ili ti San Nicolas.
Daytoy ket kalpasan nga awan pay ti naan-anay nga impormasyon a maipaay dagiti awtoridad pakaseknan ti motibo ken suspek iti napasamak a krimen.
Segun kenni P/Lt/cCol Paul Benedick Parado, agtultuloy pay laeng iti iwaywayatda nga imbestigasyon ken namnamaenna nga iti kabiitan a panawen ket malawlawaganen ti nasao nga kaso.
Nupay kasta, nagkedked a mangipaay ti naananay nga impormasion ni P/Lt/Col Paul Benedick Parado, baro a Chief of Police iti nadakamat nga ili.
Maipalagip a natay ni Barangay Chairman Francisco Bagay Jr. kalpasan a napaltu-paltugan iti uneg ti solar da iti Barangay 5 iti ili ti San Nicolas.
Nagsagaba ti naruay a tama iti bala ti paltog ti agtawen ti 45 a kapitan ken naitaray iti Black Nazarene Hospital ngem pimmusay bayat a maag-agasan.
